బేబీ మూవీ రివ్యూ: యూత్ను ఆకట్టుకునే ప్రేమ కథ!

ఈ తరం యువతీయువకుల్లో చాలా మంది ఒకరికి తెలియకుండా మరొకరితో రిలేషన్‌లో ఉంటూ చివరికి తమ జీవితాలను నాశనం చేసుకుంటున్నారు. ఇదే కాన్సెప్ట్‌తో తెరకెక్కిన సినిమా బేబీ.

By Nikhil Rampalli
| Updated: July 14, 2023 4:53 PM IST

టైటిల్ : బేబి

నటీనటులు : ఆనంద్ దేవరకొండ, వైష్ణవి చైతన్య, విరాజ్ అశ్విన్, నాగబాబు తదితరులు Also Read - ఈవారం విడుదల కాబోతున్న సినిమాలేవో తెలుసా?

సంగీతం : విజయ్ బుల్గానిన్

నిర్మాత : ఎస్.కె.ఎన్ Also Read - బేబీ ఒక హై ఇంటెన్స్ లవ్ స్టోరీ: నిర్మాత ఎస్ కే ఎన్

రచన, దర్శకత్వం : సాయి రాజేష్ నీలం

విడుదల : జూలై 14, 2023

ఆనంద్ దేవరకొండ, వైష్ణవి చైతన్య, విరాజ్ అశ్విన్ ప్రధాన పాత్రల్లో తెరకెక్కిన సినిమా బేబి. కలర్ ఫోటో సినిమాకు రచయితగా పనిచేసిన సాయి రాజేష్ ఈ సినిమాకు దర్శకుడిగా పనిచేశారు. కలర్ ఫోటో సినిమాకు రచయితగా ఆయన జాతీయ పురస్కారం అందుకున్న విషయం తెలిసిందే. సాయి రాజేష్ దర్శకత్వం వహించిన తాజా సినిమా 'బేబీ'.

ఈ సినిమాలో విజయ్ దేవరకొండ తమ్ముడు ఆనంద్ దేవరకొండ ఓ హీరో. 'అల వైకుంఠపురములో' సహా కొన్ని సినిమాల్లో, 'సాఫ్ట్‌వేర్ డేవ్‌లవ్‌పర్' వెబ్ సిరీస్‌లో నటించిన వైష్ణవి చైతన్య ఈ సినిమాతో కథానాయికగా పరిచయమవుతున్నారు. ప్రముఖ ఎడిటర్ మార్తాండ్ కె. వెంకటేష్ మేనల్లుడు విరాజ్ అశ్విన్ మరో హీరో. ఎస్.కె.ఎన్ నిర్మించిన ‘బేబీ’ సినిమా ఎలా ఉందంటే?

కథ..

వైష్ణవి (వైష్ణవి చైతన్య) బస్తీలో అమ్మాయి. ఎదురింటిలో ఉన్న అబ్బాయి ఆనంద్ (ఆనంద్ దేవరకొండ)ను ప్రేమిస్తుంది. ఆమెను అతడూ ప్రేమిస్తాడు. అయితే... టెన్త్ ఫెయిల్ కావడంతో ఆనంద్ పై చదువులకు వెళ్లక ఆటో డ్రైవర్ అవుతాడు. వైష్ణవి ఇంజనీరింగ్ జాయిన్ అవుతుంది. కొత్త పరిచయాలు వైష్ణవిలో మార్పుకు కారణం అవుతాయి. విరాజ్ (విరాజ్ అశ్విన్)కు దగ్గర అవుతుంది వైష్ణవి. పబ్బులో అతడితో రొమాన్స్ కూడా చేస్తుంది.

మరో కుర్రాడితో వైష్ణవి రొమాన్స్ విషయం ఆనంద్‌కు తెలిసిందా? తెలిసిన తర్వాత ఆనంద్ ఎలా రియాక్ట్ అయ్యాడు? పదో తరగతి నుంచి వైష్ణవి ఆనంద్ణి ప్రేమిస్తున్న సంగతి విరాజ్‌కు తెలిసిందా? తెలిసి ఏం చేశాడు? ఇంతకీ.. వైష్ణవి ఎవరిని పెళ్లి చేసుకుంది? ఆనంద్, విరాజ్.. ఎవరి ప్రేమ గెలిచింది? తెలియాలంటే సినిమా చూడాల్సిందే.

ఎలా ఉంది?

స్కూల్, కాలేజీల్లో ఈతరం ప్రేమ కథల గురించి నిరంతరం వార్తల్లో చదువుతూ, తరచూ టీవీల్లో చూస్తూనే ఉన్నాం. దర్శకుడు సాయి రాజేష్ వాటిని చూసి స్ఫూర్తి పొందినట్లున్నారు.. ఆయన రాసుకున్న కథలో ఆ కథలు అన్నీ కనిపించాయి. ఆ కథల నుంచి బలమైన సన్నివేశాలను, హార్డ్ హిట్టింగ్ ఎమోషనల్ క్యారెక్టర్లను రాసుకున్నారు. యువతలో చాలామంది ఈ సినిమా పాత్రల్లో తమను తాము తెరపై చూసుకుంటారు. సమాజంలో జరుగుతున్న అంశాలకు దర్శకుడు 'బేబీ'తో ఓ రూపం ఇచ్చారు.

ప్రీ ఇంటర్వెల్ వరకు 'బేబీ' కథ నిదానంగా సాగుతుంది. పాఠశాలలో ప్రేమకథ ఎక్కువ సేపు చూసిన ఫీలింగ్ కలుగుతుంది. అయితే... మధ్యలో మంచి పాటలు మనల్ని ఆకట్టుకుంటాయి. ప్రీ ఇంటర్వెల్ దగ్గర అసలు కథ, కథలో కాన్‌ఫ్లిక్ట్ మొదలైంది. 'ప్రేమిస్తే'తో పాటు కొన్ని సినిమాలు గుర్తు రావచ్చు. అయితే... కథానాయికలో మానసిక సంఘర్షణ, నేపథ్య సంగీతం సినిమాను నిలబెట్టింది.

ప్రీ ఇంటర్వెల్ నుంచి ఇంటర్వెల్ వరకు ఆనంద్ దేవరకొండ, విరాజ్ అశ్విన్... ఇద్దరితో వైష్ణవి చైతన్య సన్నివేశాలు ఇంటర్వెల్ తర్వాత ఎలా ఉంటుందో? అని ఆసక్తి రేపాయి. థియేటర్లలో ఆ సీన్లకు విజిల్స్, క్లాప్స్ పడటం గ్యారెంటీ. ఇంటర్వెల్ తర్వాత కథ ఎమోషనల్ టర్న్ తీసుకుంది. 'ప్రేమిస్తున్నా...' పాట, ఆ నేపథ్యంలో వచ్చే సీన్లు మౌనంగా చూసేలా చేస్తాయి. ఆ తర్వాత ఏమవుతుందో? అని ఆలోచింపజేస్తాయి. పతాక సన్నివేశాలు భావోద్వేగ భరితంగా సాగుతాయి. తండ్రి ప్రేమను చక్కగా ఆవిష్కరించారు.

ప్లస్ పాయింట్స్

'బేబీ'కి అసలైన బలం ఇంటర్వెల్, క్లైమాక్స్ & మాటలు, పాటలు! సాయి రాజేష్ రచనలో కొన్ని మాటలు థియేటర్లలో ఆటం బాంబుల్లా పేలతాయి. పవన్ కళ్యాణ్, త్రివిక్రమ్ మీద అభిమానాన్ని కూడా చూపించారు. క్యారెక్టర్లు, ఆ క్యారెక్టరైజేషన్స్ కంటే ముఖ్యంగా సొసైటీని రిప్రజెంట్ చేసేలా సాయి రాజేష్ సీన్లు రాశారు. మూడు పాత్రలతో సినిమాను నడిపించడం మాటలు కాదు. దర్శకుడిగా ఆ విషయంలో సాయి రాజేష్ పట్టు చూపించారు. పాటలు, నేపథ్య సంగీతం బావున్నాయి. కెమెరా వర్క్ అందంగా ఉంది. నిర్మాణ విలువలు ఉన్నత స్థాయిలో ఉన్నాయి.

మైనస్ పాయింట్స్

నిడివి ఇంకొంచెం తగ్గిస్తే బావుండేది. అమ్మాయిలను బూతులు తిట్టే సన్నివేశాలు మహిళలను అంతగా ఆకట్టుకోవు. కాస్త బూతులు తగ్గించి ఎమోషన్స్ను పండించేలా మాటలు రాసుకుంటే బాగుండేది. ఫస్టాఫ్ కాస్త స్లోగా ఉన్నప్పటికీ, పాత్రల పరిచయం, హీరోయిన్ పాత్ర రూపాంతరం చెందడం, సూపర్ హిట్ సాంగ్ వల్ల ఓకే అనిపిస్తుంది. ఇంటర్వెల్ బ్యాంగ్ బాగుంది. సెకండాఫ్ లో మాత్రం చాలా సన్నివేశాలు సాగదీసినట్టు అనిపిస్తాయి, పైగా మనం ఊహించుకునేలా ఉంటాయి. ఇక క్లయిమాక్స్ అయితే ఎప్పటికీ ముగిసిపోదు. కథనాన్ని మరీ ఎక్కువగా సాగతీశాడు దర్శకుడు.

తీర్పు

'బేబీ'లో కొత్త ఆనంద్ దేవరకొండ కనిపించారు. మనం ఇప్పటి వరకు చూసిన ఆనంద్ వేరు, ఈ సినిమాలో ఆనంద్ వేరు. అతని నటనలో సహజత్వం కనిపించింది. బస్తీలో ఆటో డ్రైవర్లు, పదో తరగతిలో ప్రేమలో పడిన యువకులు ఎలా ఉంటారో? అలా కనిపించారు, నటించారు. ఎమోషనల్ సీన్లు బాగా చేశారు. నటుడిగా ఆనంద్ దేవరకొండ బెస్ట్ సినిమా ఇది. ఇంతకు ముందు చేసిన సినిమాల్లో విరాజ్ అశ్విన్ నటుడిగా పేరు తెచ్చుకున్నారు. మరోసారి మంచి నటన కనబరిచారు. సంపన్న కుటుంబంలో జన్మించిన యువకుడిగా విరాజ్ చక్కగా చేశారు. ఎమోషన్స్ కూడా పలికించారు.

బస్తీలో అమ్మాయి, గ్లామర్ గాళ్... వైష్ణవి చైతన్య అయితే లుక్స్ పరంగా వేరియేషన్ చూపించడమే కాదు, నటిగానూ ఆకట్టుకున్నారు. ప్రీ ఇంటర్వెల్ సీన్ అయితే అద్భుతంగా చేశారు. కథానాయికగా వైష్ణవి చైతన్యకు మంచి డెబ్యూ ఇది. హీరో స్నేహితులుగా హర్ష, సాత్విక్ పాత్రలు పరిమితమే. ఉన్నంతలో ఇద్దరూ బాగా చేశారు. నాగబాబు నటించడం వల్ల తండ్రి పాత్రకు హుందాతనం వచ్చింది. ఓ ముఖ్యమైన సన్నివేశంలో ఆయన నటన ఆకట్టుకుంటుంది.

Rating : 3 out of 5

ByNikhil Rampalli
| Updated: July 14, 2023 4:53 PM IST

బేబీ మూవీ రివ్యూ: యూత్​ను ఆకట్టుకునే ప్రేమ కథ!

బేబీ మూవీ రివ్యూ: యూత్ను ఆకట్టుకునే ప్రేమ కథ!