భారతీయ వస్త్రధారణలో రెడ్‌ కార్పెట్‌పై తారక్.. ‘కొమురం భీమ్‌’ను గుర్తుచేసేలా ఎన్టీఆర్‌‌ కాస్ట్యూమ్స్‌

ఆస్కార్ వేదికపై భారతీయతను, తెలుగు వారి ఖ్యాతిని ప్రపంచానికి తెలిసేలా కాస్ట్యూమ్స్‌ ధరించి రెడ్‌ కార్పెట్‌పై జూనియర్ ఎన్టీఆర్ నడవనున్నారు. రెడ్‌ కార్పెట్‌పై నడిచే సమయంలో గుండెల్లో దేశాన్ని మోస్తున్నట్టేనని తారక్‌ పదే పదే చెబుతున్నారు

By Nikhil Rampalli
Published: March 12, 2023 8:39 PM IST

మరికొద్ది గంటల్లో ఆస్కార్ అవార్డుల కార్యక్రమం మొదలుకాబోతోంది. ఆర్‌‌ఆర్‌‌ఆర్‌‌ సినిమాకు ఆస్కార్ అవార్డు దక్కితే అది తెలుగు వారికి ఎంతో గర్వకారణం. అందుకే యావత్ భారతదేశం, ముఖ్యంగా తెలుగు రాష్ట్రాల ప్రజలందరూ ఆస్కార్ అకాడమీ అవార్డుల కార్యక్రమం కోసం ఎదురుచూస్తున్నారు. ఇక, ఆ కార్యక్రమంలో పాల్గొనేందుకు యంగ్ టైగర్ ఎన్టీఆర్, మెగా పవర్‌‌స్టార్ రాంచరణ్, దర్శక ధీరుడు ఎస్‌ఎస్‌ రాజమౌళి సహా పలువురు చిత్ర యూనిట్ సభ్యులు ఇప్పటికే లాస్‌ ఏంజిల్స్ చేరుకున్నారు.

ఆర్‌‌ఆర్‌‌ఆర్‌‌ సినిమాలోని ‘నాటు నాటు’ పాట 95వ ఆస్కార్ అకాడమీ అవార్డుల్లో ‘ఉత్తమ ఒరిజినల్ సాంగ్’కి నామినేట్ అయిన సంగతి తెలిసిందే. లాస్‌ ఏంజిల్స్‌ సమయం ప్రకారం మార్చి 12వ తేదీ రాత్రి 8 గంటలకు (భారతీయ కాలమానం ప్రకారం మార్చి 13వ తేదీ ఉదయం 5:30 గంటలకు) ఈ కార్యక్రమం ప్రారంభం కానుంది. Also Read - ఆయన కోసమే ఆస్కార్ అవార్డు రావాలని కోరుకున్నానంటూ సంచలన కామెంట్లు చేసిన కీరవాణి

అవార్డుల కార్యక్రమంలో రెడ్‌ కార్పెట్‌పై నడిచే సమయంలో ధరించే దుస్తులను యంగ్‌ టైగర్ ఎన్టీఆర్ స్పెషల్‌గా డిజైన్ చేయించారు. ప్రముఖ కాస్ట్యూమ్ డిజైనర్ అశ్విన్ మావ్లేకు ఆ బాధ్యతలను అప్పగించారు. ఆర్‌‌ఆర్‌‌ఆర్‌‌ సినిమాలో కొమురం భీమ్ క్యారెక్టర్‌‌ను ఎలివేట్‌ చేసేలా, భారతీయ వస్త్రధారణ గుర్తుతెచ్చేలా కాస్ట్యూమ్స్ డిజైన్ చేయించారు తారక్. ఆస్కార్‌‌కు ముందు తరువాత జరిగే పార్టీ సమయంలో ఎన్టీఆర్‌‌ వేసుకునే దుస్తులన్నీ భారతీయత ఉట్టిపడేలా జాగ్రత్తలు తీసుకున్నట్టు స్టైలిస్ట్‌ అశ్విన్ తెలిపారు.

లాస్‌ ఏంజిల్స్లో అభిమానులను కలిసిన సమయంలో కూడా ఆర్ఆర్‌‌ఆర్‌‌ సినిమాలో పులి సీక్వెన్స్ను గుర్తుచేసేలా పులి ముఖం ఉన్న టీషర్ట్‌ ధరించారు ఎన్టీఆర్. ఇక, మరో ఈవెంట్‌లో కొమురం భీమ్ క్యారెక్టర్‌‌ను ప్రతిబింబించేలా బ్లూ కలర్‌‌ సూట్‌తో కనిపించారు తారక్. Also Read - ఆస్కార్ ఎంట్రీ కోసం చేసిన ఖర్చుపై రాజమౌళి కొడుకు క్లారిటీ.. ఎంత పెట్టారంటే?

ఆస్కార్ అవార్డుల వేడుకలో ఆర్‌‌ఆర్‌‌ఆర్‌‌ సినిమాలో ఎమ్‌ఎమ్‌ కీరవాణి స్వరపరిచిన ‘నాటు నాటు’ పాటను సింగర్స్‌ రాహుల్ సిప్లిగంజ్, కాల భైరవ పాడనున్నారు. ఇక, అదే పాటకు అమెరికన్‌ యాక్టర్‌ లారెన్ గొట్లెబ్ డ్యాన్స్ చేయనున్నారు. ఈ విషయాన్ని ఆమె సోషల్ మీడియా ద్వారా షేర్ చేశారు. నాటు నాటు పాటకు డ్యాన్స్‌ చేయడం ఆనందంగా ఉందని పేర్కొన్నారు.

ఇక, ఆస్కార్‌‌ వేడుక కోసం యూఎస్‌ వెళ్లిన తారక్.. కాలిఫోర్నియా బేవర్లీహిల్స్‌ లోని తన హోటల్ రూమ్‌లో తీసిన పిక్‌ను షేర్ చేశారు. ఆ ఫోటోలో తారక్‌ పులి ముఖం ఉన్న డిజైనర్‌‌ టీషర్ట్‌ వేసుకున్నారు. తారక్‌ను ఆయన అభిమానులు ముద్దుగా యంగ్‌ టైగర్ అని పిలుచుకుంటారు అనే విషయం తెలిసిందే. ఆ ఫోటో చూసిన ఫ్యాన్స్‌ #NTRGoesGlobal హ్యాష్‌ ట్యాగ్‌ను ట్రెండ్ చేస్తున్నారు. కాగా, నాటు నాటు పాటకు ఇప్పటికే గోల్డెన్ గ్లోబ్ సహా పలు అంతర్జాతీయ అవార్డులు దక్కాయి. Also Read - రాంచరణ్‌కు ఆ ఫుడ్ అంటే చాలా ఇష్టం.. సీక్రెట్ చెప్పేసిన యంగ్ హీరో శర్వానంద్

కాగా, ఎన్టీఆర్ ఆస్కార్ వేడుకల నుంచి తిరిగొచ్చిన తర్వాత NTR30 మూవీ షూటింగ్ ప్రారంభం కానుంది. కొరటాల శివ దర్శకత్వంలో తెరకెక్కనున్న ఈ ప్రాజెక్ట్ సెట్స్‌ పైకి వెళ్లనుంది. అనిరుధ్ రవిచందర్ మ్యూజిక్ అందించనున్న NTR30 సినిమాలో బాలీవుడ్ బ్యూటీ జాన్వీ కపూర్ హీరోయిన్‌గా నటించనున్నారు.

ByNikhil Rampalli
Published: March 12, 2023 8:39 PM IST