ఆ క్రికెటర్ బయోపిక్‌లో నటించాలని ఉందంటున్న మెగా పవర్‌‌స్టార్ రాంచరణ్

మెగా పవర్‌‌స్టార్‌‌ ప్రస్తుతం ఆర్‌‌ఆర్‌‌ఆర్‌‌ సినిమా సక్సెస్‌ను ఎంజాయ్ చేస్తున్నారు. అలాగే నాటు నాటు పాట ఆస్కార్ అవార్డు దక్కించుకోవడంతో ఆనందంగా ఉన్నారు. శంకర్ దర్శకత్వంలో సినిమా షూటింగ్ పూర్తి చేసే పనిలో ఉన్నారు చరణ్

By Nikhil Rampalli
| Updated: March 18, 2023 5:21 PM IST

ఆర్‌‌ఆర్‌‌ఆర్‌‌ సినిమాతో ప్రపంచవ్యాప్తంగా పేరు తెచ్చుకున్నారు మెగాపవర్‌‌స్టార్ రాంచరణ్. ఈ సినిమాతో చరణ్ ఇమేజ్ అమాంతం పెరిగిపోయింది. మెగాస్టార్ చిరంజీవి కొడుకుగా ఇండస్ట్రీలోకి అడుగుపెట్టిన చరణ్.. మగధీర సినిమాతో స్టార్ హీరోగా ఎదిగారు. ఆ తర్వాత క్రమంగా హిట్ సినిమాల్లో నటిస్తూ చిరంజీవి పేరును నిలబెట్టారు.
ఇక, దర్శక ధీరుడు రాజమౌళితో కెరీర్‌‌లో చేసిన రెండో సినిమా మగధీర.. చరణ్‌కు ఉన్న మార్కెట్‌ను టాలీవుడ్‌కు తెలిసేలా చేసింది. అదే విధంగా మరోసారి రాజమౌళి దర్శకత్వంలో చరణ్‌ చేసిన ఆర్‌‌ఆర్‌‌ఆర్‌‌.. ఎంత క్రేజ్‌ తెచ్చిపెట్టిందో అందరికీ తెలిసిందే. ఈ సినిమాలో యంగ్ టైగర్‌‌ ఎన్టీఆర్‌‌తో కలిసి రాంచరణ్‌ చేసిన డాన్స్కు ప్రపంచం మొత్తాన్ని ఉర్రూతలూగించింది.
ఆర్‌‌ఆర్‌‌ఆర్‌‌ సినిమాలోని ‘నాటు నాటు’ పాట బెస్ట్ ఒరిజినల్ సాంగ్ కేటగిరీలో ఆస్కార్‌‌ అవార్డు గెలిచింది. దీంతో చరణ్‌ ఇమేజ్ మరింత పెరిగింది. ఆస్కార్ అవార్డుల కార్యక్రమంలో పాల్గొన్న చరణ్‌.. వేసిన కాస్ట్యూమ్స్‌ కూడా అంతే క్రేజ్‌ను సొంతం చేసుకున్నాయి. ఇక, ఆస్కార్ కార్యక్రమం ముగిసిన తర్వాత చరణ్.. నేరుగా ఢిల్లీ వెళ్లారు. కేంద్ర హోం మంత్రి అమిత్ షాతో కలిసి ఒక ప్రైవేటు కార్యక్రమంలో పాల్గొన్నారు.
ఇక, ఆస్కార్ వేదికపై నాటు నాటు పాట ప్రదర్శించారంటే ఆ పాటకు ఎంత క్రేజ్ వచ్చిందో చెప్పనక్కర్లేదు. ఇటీవల భారత్–ఆస్ట్రేలియా మధ్య జరిగిన మొదటి వన్డే మ్యాచ్‌లో నాటు నాటు పాట హుక్‌ స్టెప్‌ను మాజీ కెప్టెన్ విరాట్‌ కోహ్లీ వేశారు. ప్రస్తుతం ఆ వీడియో సోషల్ మీడియాలో వైరల్ అవుతోంది. అదే సమయంలో ఢిల్లీలో జరిగిన కార్యక్రమంలో చరణ్‌ తన మనసులోని మాటను బయటపెట్టారు. చరణ్ చెప్పిన మాటలు కూడా వైరల్ అవుతున్నాయి.

King Kohli dancing on @AlwaysRamCharan #NaatuNaatu song on the field??@imVkohli #ViratKohli #GlobalStarRamCharan pic.twitter.com/BNIRu7QIjH

— SIDDHUCHEETAH (@Siddhucheetah) March 17, 2023

నాటు నాటు పాటలోని స్టెప్‌ను విరాట్ కోహ్లీ వేయడంపై చరణ్‌ అభిప్రాయాన్ని కోరారు. దీనికి బదులిస్తూ.. అవకాశం వస్తే విరాట్‌ కోహ్లీ బయోపిక్‌లో నటించాలని ఉందని తన మనసులోని మాటను బయటపెట్టారు చరణ్.
ఆర్‌‌ఆర్‌‌ఆర్‌‌ సినిమా సక్సెస్‌, ఆస్కార్ అవార్డు గెలుచుకున్న ఆనందంలో ఉన్న చరణ్‌ను తర్వాత ఎటువంటి జానర్‌‌ సినిమాల్లో నటించాలనుకుంటున్నారని ఇండియా టుడే కాన్‌క్లేవ్‌లో పలువరు ప్రశ్నించారు. దీనికి సమాధానంగా స్పోర్ట్స్ ఆధారిత సినిమాలో నటించాలని అనుకుంటున్నానని చెప్పారు చరణ్.
ఏదైనా స్పోర్ట్స్‌ కథతో సినిమా చేయాలనుకుంటున్నాను. విరాట్‌ కోహ్లీ బయోపిక్‌లో నటిస్తారా అని అడిగినప్పుడు.. ‘ఫెంటాస్టిక్.. విరాట్‌ ఒక ఇన్‌స్పైరింగ్ పర్సన్. ఆ అవకాశం వస్తే అద్భుతంగా ఉంటుంది’ అన్నారు చరణ్.
ప్రస్తుతం రాంచరణ్‌.. శంకర్‌‌ దర్శకత్వంలో సినిమా చేస్తున్నారు. RC15 వర్కింగ్ టైటిల్‌తో తెరకెక్కుతున్న ఈ సినిమా షూటింగ్ శరవేగంగా జరుగుతోంది. ఈ సినిమాలో కియారా అద్వానీ హీరోయిన్‌గా నటిస్తున్నారు. కాగా, ఈ సినిమాలో చరణ్‌ ఎలక్షన్ ఆఫీసర్‌‌గా నటిస్తున్నారనే వార్తలు వినిపిస్తున్నాయి.

Also watch

ByNikhil Rampalli
| Updated: March 18, 2023 5:21 PM IST